٥ مطاعم جبلية لازم تزوروها هل شتوية بلبنان

مين منا ما بحب قعدة الجبل حد النار؟ أكيد ولا شي أجمل من هيك قعدة مع أكل طيب وجو دافي وشوية موسيقى، تعرفوا معنا على ٥ مطاعم جبلية مميزة.

١. جلسة ليزا، زغرين

لكل حدا حابب يعمل مشوار على الضيعة بهل طقس ليستمتع بالتلج والطقس البارد ويعيش أجواء الشتوية الحميمة، لازم يعمل مشوار على جلسة ليزا بمنطقة زغرين حد ضيعة ضهور شوير . الأكل اللبناني على أصولو من مازة لطبخات لبنانية تراثية متل الفوارغ والكاستاليتا رح تلاقوهن عند هل مطعم. تخايلوا حالكن عم تاكلوا كل هل أكل الطيب مع أجمل قعدة شتوية حد النار وعلى أغاني فيروز. أما المنظر من الجبل لي مغطى تلج ما في لزوم نشرح قدي حلو وقدي بيشرح الصدر.

الرقم: 934 158 03

٢. لوغ هاوس LogHouse BBQ BROS، ميروبا

إذا عبالكن تعيشوا مغامرة مهضومة وغريبة بلبنان بهل شتوية، دوروا السيارة وطلعوا على ضيعة ميروبا بتلاقوا بيت خشب متل لي بتشوفوهن بالأفلام ناطركن: لوغ هاوس LOGHOUSE BBQ BROS. بيت خرج قعدة رومانسية أو مع الأصحاب، في موقدة نار ومطعم بحضر عليها الشيف كل أنواع البرغر لي بتحبوا تجربوها بهيك طقس. بتضم قائمة الطعام أنواع مختلفة من البرغر الشهية بالإضافة للبطاطا المقلية الشهية، واللحمة المقددة والدجاج المشوي، وإذا عبالكن تجربوا شي روعة، ما إلكن غير البرغر المحشية باللحمة والجبنة. كل شي بيتحضر على الشواية قدامكن لتستمتعوا بكل لحظة وتحسوا بطعمة الشتوية على المزبوط.

الرقم: 699 099 70

٣. بيتنا، الباروك

القعدة الشتوية بقلب كهف حجر كلا أجواء دافية وحميمة من الموقد بتكملها المأكولات اللبنانية اللذيذة، شايفين قدي معقول تكون جلسة مثالية؟ إنتو وقاعدين حد النار، الأكل بيوصل على طاولتكن بالفخارة لتحسوا بكل لقمة وترجعوا بالزمن على إيام ما كانت القصص تمشي على الهدا. كل أصناف الأكل اللبناني موجودة وكل شي من حواضر البيت، مصنوع بفن وحب. حتى الكبة النية بيعملوها بقلب الجرن، متل عادات أهل الجبل، بس تخلصوا أكلكن ما تنسوا تستمتعوا بفنجان قهوة غير شكل على الطريقة القديمة.

الرقم: 456 841 03

٤. طريق النحل، فاريا

مغطى بالتلج من كل الميلات، رح تلاقوا هل مطعم لي بقدم أشهى المأكولات التقليدية يلي محضرة بجو دافي ومريح. كل الناس بتقصدوا لتجربة الكبة كباب والأكل اللبناني التقليدي لي مقدم بحب وفن. زوروا فاريا وكفوا مشواركن على هل مطعم لتعيشوا تجربة الأكل المفتوحة والممتعة.

الرقم: 394 737 03

٥. لي كاف Les Caves-Roum، جزين

هل محل بقدم أطباق لبنانية وعالمية مع قعدة حجر رح تحسسكن بالدفا والجمال: قاعدين بكهف من حجر. الحبيبين رح يمبسطوا بهل قعدة الرومانسية والجو المليان حب ورواق. القناطر رح تذكركن بتاريخ لبنان العريق وتاخدكن رحلة سعيدة على فترة جميلة من الزمن مع الموسيقى وفيروز وكاس عرق بلدي. فعلاً هل مطعم من أجمل القعدات الشتوية حد النار، إذا عبالكن تتذكروا لبنان الحلو، ضروري تجربوا وتاكلوا أطيب لقمة هون وبس تخلصوا تكفو مشواركن على ضيعة جزين.

الرقم: 292 810 07

شوفوا كمان، ٩ مطاعم ببيروت فيكن تروقوا أعصابكن فيها.