أكل وشرب
أكلات مشهورة من كل منطقة بلبنان
كلنا منعرف انه مافي أطيب من الأكل اللبناني والضيافة اللبنانية، وكيف إذا كان كل منطقة بلبنان مشهورة بتقديم طبق بيحمل اسمها والنفس المشغول فيه ليعطينا أطيب لقمة لبنانية على أصولها، تعو نتعرف على بعض المأكولات يلي بتميز كل منطقة عن غيرها.
١. الكبة الزغرتاوية:
ما في بيت زغرتاوي بيخلا من الكبة الزغرتاوية يلي صارت من تراث زغرتا ولبنان، هالكبة يلي سر طعمتها هو وجود الشحم واللحم بالقرص وبدنا نذكر أنه زغرتا عملت أكبر صينية كبة دخلت موسوعة غينيس.
٢. الفراكة الجنوبية:
ما في أطيب من اللحمة المدقوقة بالجرن يلي بينضفلها البرغل مع الملح والكمونة لتصير فراكة جنوبية مأصلة بتفوح منها رائحة الجنوب الحبيب.
٣. المفتقة البيروتية:
المفتقة البيروتية أشهر من أن تعرف ببيروت يلي بتميزوا فيها البيارتة المصنوعة من الرز والعقدة الصفرا.
شوفوا هالفيدو عن أطيب مفتقة ببيروت!
٤. الصفيحة البعلبكية:
ميلوا عبعلبك وكلوا أطيب صفيحة بعلبكية طازة من الفرن، طعمتها الممزوجة باللحمة والتوابل بالعجينة المحمصة مع رشة حامض وحر ولا أطيب من هيك.
٥. حلاوة الجبن واللحم بعجين الطرابلسي:
طرابلس هي منبع الحلويات اللبنانية من حلاوة الجبن وحلاوة الرز المشهورين بطرابلس وما فينا ننسى الصفيحة الطرابلسية المطعمة برب الرمان واللبن.
٦. المازة الزحلاوية:
زحلة عروسة البقاع بتتميز بتقديم أطيب وأشهى أنواع المازة اللبنانية يلي خلقت بزحلة وانتشرت بكل لبنان – وخاصةً الفتوش!
٧. ألبان وأجبان البقاع:
أهل البقاع مشهورين بصناعة كل مشتقات الحليب من الألبان والأجبان على أنواعها والأريشة بالعسل البقاعية ورائحة خبز المرقوق المخبوز عالصاج يلي بتفوح بكل أرجاء السهل.